Տեղեկատվական կենտրոն

Պաշտոնական լրահոս

Պետական նախարարը մարզաշխարհի ներկայացուցիչների հետ քննարկել է սպորտի զարգացմանն առնչվող հարցեր

28.07.2022

Արցախի Հանրապետության պետական նախարար Արտակ Բեգլարյանը հուլիսի 28-ին ԿԳՄՍ նախարար Անահիտ Հակոբյանի հետ միասին հանդիպում է ունեցել հանրապետությունում գործող մարզական ֆեդերացիաների նախագահների, շրջանային վարչակազմերի սպորտի գծով մասնագետների ու մարզադպրոցների տնօրենների հետ: Պետական նախարարը նախ շնորհավորել է տարվա ընթացքում ունեցած մարզական հաջողությունների կապակցությամբ, ապա անմիջական մթնոլորտում քննարկման հրավիրել նրանց սպորտի բնագավառում պետական քաղաքականության արդյունավետության շարունակական բարձրացման նպատակով:
«ԱՀ կառավարության առաջնահերթությունների թվում է նաև պրոֆեսիոնալ ու սիրողական սպորտի զարգացումը, և նպատակը իրագործելու համար պատրաստ ենք ավելի մեծ ռեսուրսներ ներդնել և առավել արդյունավետ կառավարել համակարգը: Այս աշխատանքներում ակնկալում ենք ձեր բարձր ներգրավվածությունը՝ լինելով պետական քաղաքականության մշակման ու իրականացման հենարանն ու հասցեատերը»,- իր խոսքում նշել է Արտակ Բեգլարյանը:
Հանդիպման ընթացքում ծավալուն քննարկում է տեղի ունեցել սպորտի հանրահռչակման, մարզական ֆեդերացիաների ու մարզադպրոցների կարիքների գնահատման և բավարարման, հայաստանյան ու միջազգային առաջնություններին մասնակցության ապահովման համար մարզիկների նախապատրաստման, անհրաժեշտ ենթակառուցվածքների ձևավորման եվ այլ հարցերի շուրջ:
 

← Վերադառնալ ցուցակին